BuddhaWeg-Sangha
Mitglied der Association Bouddhiste Zen d'Europe
Mitglied der Deutschen Buddhistischen Union
DA KERN VOM LEHRVORDRAAG VO DR GROSSA WOISHEID
Avaalokideschwaara, des Erleuchtungswesa wos große Mitgfühl hod, schaffd älle Daag diaf denna in dr großa Woisheid, ma seid Hannja Haramida. Klar sieht s do, dass dui feif Häufala älle leer send. So ko s älle, dia wo leidat, befreia.
Schaariputra, woisch Form isch nex anders wia Leerhoid ond dia Leerhoid isch aunex anders als wia dui Form. Form isch Leerhoid ond Leerhoid isch Form. Ond ebaso isch des au med de Gfühl, dr Wahrnehmig, dr Fierstellig ond em ennerschda Gspür. (Älles isch ebbes ond au weder nex - ond au älleszsamma.)
Woisch Schaariputra, älles Leba isch om od drom bis oba dra Leerhoid. S‘ wird ed ond vrad au ed, s isch ed sauber ond ed dregad, s wird ed meh ond ed wenger.
In der Leerhoid geits koi Gstald, koi Gfühl, koi Wahrnehmig, koi Fierstellig, koi ennerschdes Gspür; koine Guggerle, koine Lauscherle, koin Riachkolba, koi Läll, koin Figürle, koi Vrstanda; koi Farb, koi Gräusch, koi Gschmeggle, koi Schmegga, koi Berührig, koin Begriff ond au koine Senn. Koi Äfferei, no s End vo dr Äfferei. Koi abacha sei ond koin Dood ond au no koi End vom abacha sei ond vom Dood. Koi Elend, koi wohers kommt, koi wonnahs got, koin Weg furt davo, koi Wissa und au koi na kriaga.
Med da großa Woisheid Hannja Haramida hend Erleuchdungswesa a Denga ond a Neispüra dem nex em Weg stod. Ond ohne Stoi em Weg hasch a koi Fragsausa. Se deischad sich ed ond soo fenda se s Erwacha ond s End vom Loida. Älle Buddhas vo älle drei Welda kennad s greaschde Erwacha durch die große Woisheid Hannja Haramida han.
Du muasch au vrstanda, dass dui große Woisheid Hannja Haramida da jesasmesige ond iberall gildige hoilig Spruch isch. Da große glänzige hoilig Spruch, ond au no dr ällerhechstde overgleichliche hoilig Spruch weller älles Ohglick beendet, des isch oovergleichlich ond absolud gwiss.
Ond doher seid der hoilig Spruch vo dr Höchsta Woisheid: Lassad os älle drüber nausganga, ond no da drieber naus au no bis a s Ufer vom große Erwacha!
GYA TEI GYA TEI HA RA GYA TEI HARA SO
GYA TEI BO JI SOWA KA
HANNYA SHINGYO